അഭിനയിച്ച ചിത്രങ്ങൾ 100 കോടി ക്ലബിൽ, ഈ വർഷം ബോളിവുഡിന് നേട്ടമുണ്ടാക്കിയത് ഈ രണ്ട് താരങ്ങൾ  

ബോളിവുഡിനെ സംബന്ധിച്ചിടത്തോളം 2019 എന്നത് ഒരു റെക്കോർഡ് വർഷമായിരുന്നു. കാരണം ഹിന്ദി ചിത്രങ്ങളുടെ റിലീസിൽ നിന്ന് മാത്രം 4400 കോടി രൂപയുടെ കളക്ഷനാണ് ബോളിവുഡ് നേടിയത്. 2018 ൽ ഇത് 3,600 കോടി രൂപയായിരുന്നു. ഇറങ്ങിയ ചിത്രങ്ങളെല്ലാം ആരാധകർ കയ്യുംനീട്ടി സ്വീകരിച്ചു. നിരവധി മികച്ച ചിത്രങ്ങൾ പ്രദർശനത്തിന് എത്തിയതിനാൽ തിയേറ്ററിൽ ഓളമുണ്ടാക്കിയ വർഷംകൂടിയായിരുന്നു 2019. എന്നാൽ 2020ൽ സ്ഥിതിഗതികൾ ആകെ മാറി. കൊവിഡ്-19നെ തുടർന്നുണ്ടായ ലോക്ക് ഡൗൺ കാരണം തിയേറ്ററുകൾ അടച്ചു. നിരവധി സിനിമകളുടെ ചിത്രീകരണം മുടങ്ങി. 2020ല്‍ 5000 കോടി രൂപയുടെ വരുമാനമായിരുന്നു ബോളിവു‍ഡ് പ്രതീക്ഷിച്ചിരുന്നത്. കൊറോണ വൈറസ് മൂലം ബോളിവുഡ് മാത്രമല്ല ലോകത്തെ മൊത്തം സിനിമ മേഖലയും പ്രതിസന്ധിയിലായി.

ബോക്സ് ഓഫീസ് റിപ്പോർട്ട് പ്രകാരം ഈ വർഷം 780 കോടി രൂപയാണ് ബോളിവുഡിന്റെ വരുമാനം. പ്രദർശനത്തിനെത്തിയ 20 സിനിമകളിൽ അഞ്ചെണ്ണം മാത്രമാണ് മികച്ച കളക്ഷൻ നേടിയത്. തൻ‌ഹാജി: ദി അൺ‌സംഗ് വാരിയർ, ബാഗി 3, സ്ട്രീറ്റ് ഡാൻസർ 3 ഡി, ശുഭ് മംഗൽ സയാ സദ്ദാൻ, മലംഗ് എന്നിവയാണ് ബോക്സ് ഓഫീസിൽ മികച്ച കളക്ഷൻ നേടിയ അഞ്ച് ചിത്രങ്ങൾ. ഇതിൽ തന്നെ തൻ‌ഹാജിയും ബാഗി 3യുമാണ് 100 കോടി ക്ലബിൽ ഇടംനേടിയ ചിത്രങ്ങൾ.

അന്തരിച്ച ബോളിവുഡ് നടൻ ഇർഫാൻ ഖാൻ നായകനായെത്തിയ അഗ്രേസി മീഡിയം എന്ന ചിത്രവും ഇതേസമയം റിലീസിനെത്തിയിരുന്നു. ബോക്സ് ഓഫീസിൽ 13.54 കോടി രൂപയാണ് ചിത്രം നേടിയത്. റെമോ ഡിസൂസ സംവിധാനം ചെയ്ത വരുൺ ധവാൻ ചിത്രം സ്ട്രീറ്റ് ഡാൻസർ 3 ഡിയും ഈ വർഷമാദ്യം തിയേറ്ററുകളിൽ പ്രദർശനത്തിനെത്തിയിരുന്നു. 97 കോടി രൂപയാണ് ചിത്രം നേടിയത്.

അജയ് ദേവ്ഗൺ നായകനായ തൻഹാജി: അൺസംഗ് വാരിയർ 280 കോടി രൂപയാണ് നേടിയത്. തുടക്കത്തിൽ 15.10 കോടി രൂപയായിരുന്നു ചിത്രത്തിന്റെ കളക്ഷൻ. ഫെബ്രുവരിയിലാണ് ചിത്രം റിലീസിനെത്തിയത്. കൊറോണ വൈറസിനെ തുടർന്ന് ചിത്രം അധികനാൾ തിയേറ്ററിൽ പ്രദർിപ്പിക്കാനായില്ല.

സിനിമ കാണാൻ ആളുകൾക്ക് താൽപര്യമുണ്ടായിരുന്നെങ്കിലും പകർച്ചവ്യാധി ഭയന്ന് ആളുകൾ തിയേറ്ററിൽ പോകാത്തതിനെ തുടർന്ന് തൻഹാജിയുടെ പ്രദർശനം നിർത്തുകയായിരുന്നു. ഇതിനുശേഷം ഓം റൗത്ത് സംവിധാനം ചെയ്ത ചിത്രം ഒടിടി പ്ലാറ്റ്ഫോമുകളിൽ പ്രദർശിപ്പിച്ചു. ടിവിയിലും ഒടിടിയിലും ചിത്രം വലിയ നേട്ടമുണ്ടാക്കിയിരുന്നു.

ടെഗർ ഷെറഫ് നായകനായെത്തിയ ബാഗി 3 പ്രദർശനത്തിനെത്തി രണ്ടാഴ്ച കഴിഞ്ഞാണ് ലോക്ക് ഡൗൺ പ്രഖ്യാപിച്ച് തിയേറ്ററുകൾ അടച്ചത്. റിലീസ് ആയ ദിവസം തന്നെ 17.50 കോടി രൂപ നേടിയ ബാഗി 3 ഈ വർഷത്തെ ഏറ്റവും വലിയ ഓപ്പണിംഗ് ചിത്രമായിരുന്നു. പത്ത് ദിവസം കൊണ്ട് 95 കോടി രൂപയാണ് ബോക്സ് ഓഫീസ് ഹിറ്റ് ചിത്രമായി ബാഗി 3 നേടിയത്. ആകെ 137 കോടി രൂപയാണ് ചിത്രത്തിന്റെ വരുമാനം. സാറ്റലൈറ്റ് വഴിയും മറ്റും യുവാക്കളുടെ ഹരമായ ടൈഗറിന്റെ ബാഗി 3 നേട്ടമുണ്ടാക്കി.